bala se ho ki ilaj-e-gham-e-hayat na ho

balā se ho ki ilāj-e-ġham-e-hayāt na ho

mirī nazar meñ magar sirf merī zaat na ho

nazar meñ din ke añdhere raheñ to sham.a-garo

hayāt-e-sham.a-e-farozāñ kī ek raat na ho

yahī mizāj hamesha se hai mohabbat kā

maiñ haar jā.ūñ ye baazī kisī ko maat na ho

jahāñ ḳhilāf hai lekin ye ġhair mumkin hai

tabāhiyoñ meñ hamārī hamārā haat na ho

maza to jab hai koī mujh se multafit ho magar

mirī nazar meñ koī vaj.h-e-iltifāt na ho

hamārī baat kī tardīd kyoñ nahīñ karte

jo chāhte haiñ zamāna hamāre saath na ho

ham apnī sat.h se gir jaa.eñ kis qadar 'nazmī'

hamāre paas agar ġham kī kā.enāt na ho

bala se ho ki ilaj-e-gham-e-hayat na ho

meri nazar mein magar sirf meri zat na ho

nazar mein din ke andhere rahen to shama-garo

hayat-e-shama-e-farozan ki ek raat na ho

yahi mizaj hamesha se hai mohabbat ka

main haar jaun ye bazi kisi ko mat na ho

jahan KHilaf hai lekin ye ghair mumkin hai

tabahiyon mein hamari hamara hat na ho

maza to jab hai koi mujh se multafit ho magar

meri nazar mein koi wajh-e-iltifat na ho

hamari baat ki tardid kyon nahin karte

jo chahte hain zamana hamare sath na ho

hum apni sath se gir jaen kis qadar 'nazmi'

hamare pas agar gham ki kaenat na ho