ban gai dam par yahan abru-e-jaanan dekh kar

ban ga.ī dam par yahāñ abru-e-jānāñ dekh kar

chauñktā huuñ raat phir ḳhvāb-e-pareshāñ dekh kar

maiñ to qaa.il ho gayā huuñ rabt-e-husn-o-ishq kā

vo bhī ro dete haiñ aksar mujh ko giryāñ dekh kar

ḳhāksārān-e-mohabbat se koī sīkhe adab

jhuk ga.e sajde meñ naqsh-e-pā-e-jānāñ dekh kar

vo abhī pahlū meñ haiñ ye ashk-bārī kyā zarūr

kuchh zarā mauqa mahal ai chashm-e-giryāñ dekh kar

ḳhanda-e-gul par mujhe ab kis tarah ronā na aa.e

hañste haiñ vo baaġh meñ bulbul ko nālāñ dekh kar

is qadar josh-e-junūñ meñ ḳhvāhish-e-īzā mujhe

talve khujlāne lage ḳhār-e-muġhīlāñ dekh kar

tauba karne ko to kar lī lekin is ko kyā karūñ

Dagmagā jaatī hai niyyat abr-e-bārāñ dekh kar

vaqt-e-bārish abr meñ bijlī chamaktī hai zarūr

kyoñ na hañs de vo sitam-gar mujh ko giryāñ dekh kar

ham qayāmat ko bhalā kab mānte lekin 'fahīm'

aaj qaa.il ho ga.e raftār-e-jānāñ dekh kar

ban gai dam par yahan abru-e-jaanan dekh kar

chaunkta hun raat phir KHwab-e-pareshan dekh kar

main to qail ho gaya hun rabt-e-husn-o-ishq ka

wo bhi ro dete hain aksar mujh ko giryan dekh kar

KHaksaran-e-mohabbat se koi sikhe adab

jhuk gae sajde mein naqsh-e-pa-e-jaanan dekh kar

wo abhi pahlu mein hain ye ashk-bari kya zarur

kuchh zara mauqa mahal ai chashm-e-giryan dekh kar

KHanda-e-gul par mujhe ab kis tarah rona na aae

hanste hain wo bagh mein bulbul ko nalan dekh kar

is qadar josh-e-junun mein KHwahish-e-iza mujhe

talwe khujlane lage KHar-e-mughilan dekh kar

tauba karne ko to kar li lekin is ko kya karun

Dagmaga jati hai niyyat abr-e-baran dekh kar

waqt-e-barish abr mein bijli chamakti hai zarur

kyon na hans de wo sitam-gar mujh ko giryan dekh kar

hum qayamat ko bhala kab mante lekin 'fahim'

aaj qail ho gae raftar-e-jaanan dekh kar