ban gaya dil agar bayan na hua

ban gayā dil agar bayāñ na huā

ġham bahar-hāl rā.egāñ na huā

dīdanī hai bahār manzil kī

aaj manzil pe kārvāñ na huā

tū ne sayyād kitnī mehnat kī

ye qafas phir bhī āshiyāñ na huā

nazreñ afsāna vo sunā ke rahīñ

jo zabāñ se kabhī bayāñ na huā

maiñ ne kī hai shikastagī manzūr

maiñ kabhī gard-e-kārvāñ na huā

pūchhte haiñ vo dāstān-e-firāq

haa.e vo ġham jo dāstāñ na huā

barq lahrā rahī hai gulshan meñ

aaj hī merā āshiyāñ na huā

maiñ ne apnī taraf bhī dekhā thā

ḳhair guzrī vo bad-gumāñ na huā

kab vo āmāda-e-sitam na hue

kab 'sa.īd' apnā imtihāñ na huā

ban gaya dil agar bayan na hua

gham bahar-haal raegan na hua

didani hai bahaar manzil ki

aaj manzil pe karwan na hua

tu ne sayyaad kitni mehnat ki

ye qafas phir bhi aashiyan na hua

nazren afsana wo suna ke rahin

jo zaban se kabhi bayan na hua

main ne ki hai shikastagi manzur

main kabhi gard-e-karwan na hua

puchhte hain wo dastan-e-firaq

hae wo gham jo dastan na hua

barq lahra rahi hai gulshan mein

aaj hi mera aashiyan na hua

main ne apni taraf bhi dekha tha

KHair guzri wo bad-guman na hua

kab wo aamada-e-sitam na hue

kab 'said' apna imtihan na hua