ban kar jo koi samne aata hai aaina

ban kar jo koī sāmne aatā hai aa.ina

ḳheme meñ dil ke aa ke lagātā hai aa.ina

vo kaun hai ye mujh se kabhī pūchhtā nahīñ

maiñ kaun huuñ ye mujh ko batātā hai ā.īna

is aks ke bar-aks koī aks hai kahīñ

kyoñ aks ko bar-aks dikhātā hai aa.ina

ḳhud ko sajā.e jaate haiñ vo aa.ine ko dekh

jalvoñ se un ke ḳhud ko sajātā hai aa.ina

ḳhud aa.ine pe un kī Thahartī nahīñ nazar

kaise phir un se aañkh milātā hai aa.ina

ye merā aks hai to magar ajnabī sā hai

kyoñ kar mujhe mujhī sī chhupātā hai aa.ina

kab dil ke aa.ine meñ khilā karte haiñ gulāb

kab aa.ine meñ phuul khilātā hai aa.ina

āveza dekhte haiñ vo jhuk kar qarīb se

yā un ko koī raaz batātā hai aa.ina

jab merā aks mujh se mumāsil nahīñ rahā

kyoñ merā aks mujh ko dikhātā hai aa.ina

is aa.ine meñ aks kisī kā hai rāt-din

'ahmad' ye ishq dil ko banātā hai aa.ina

ban kar jo koi samne aata hai aaina

KHeme mein dil ke aa ke lagata hai aaina

wo kaun hai ye mujh se kabhi puchhta nahin

main kaun hun ye mujh ko batata hai aaina

is aks ke bar-aks koi aks hai kahin

kyon aks ko bar-aks dikhata hai aaina

KHud ko sajae jate hain wo aaine ko dekh

jalwon se un ke KHud ko sajata hai aaina

KHud aaine pe un ki Thaharti nahin nazar

kaise phir un se aankh milata hai aaina

ye mera aks hai to magar ajnabi sa hai

kyon kar mujhe mujhi si chhupata hai aaina

kab dil ke aaine mein khila karte hain gulab

kab aaine mein phul khilata hai aaina

aaweza dekhte hain wo jhuk kar qarib se

ya un ko koi raaz batata hai aaina

jab mera aks mujh se mumasil nahin raha

kyon mera aks mujh ko dikhata hai aaina

is aaine mein aks kisi ka hai raat-din

'ahmad' ye ishq dil ko banata hai aaina