bana-e-ishq hai bas ustuwar karne tak

binā-e-ishq hai bas ustuvār karne tak

falak ko chain kahāñ phir ġhubār karne tak

ye kab kahā ki bharosā nahīñ hai va.ade par

maiñ jī sakūñgā tirā intizār karne tak

ḳhabar na thī vo mujhe qatl karne aayā hai

maiñ us ko dost samajhtā thā vaar karne tak

phir is ke ba.ad kahāñ imtiyāz-e-dāman-o-dil

junūñ hai shauq faqat iḳhtiyār karne tak

vo ḳhu-e-ishq basī hai hamārī fitrat meñ

ki saath dete haiñ ham jaañ nisār karne tak

kuchh is se pahle hī aa jaa.e merī ziist kī shaam

hayāt vaqf ho jab din shumār karne tak

mere qabīle kā 'mohsin' ye qaul-e-faisal hai

ki zulm zulm hai sabr iḳhtiyār karne tak

bina-e-ishq hai bas ustuwar karne tak

falak ko chain kahan phir ghubar karne tak

ye kab kaha ki bharosa nahin hai wade par

main ji sakunga tera intizar karne tak

KHabar na thi wo mujhe qatl karne aaya hai

main us ko dost samajhta tha war karne tak

phir is ke baad kahan imtiyaz-e-daman-o-dil

junun hai shauq faqat iKHtiyar karne tak

wo KHu-e-ishq basi hai hamari fitrat mein

ki sath dete hain hum jaan nisar karne tak

kuchh is se pahle hi aa jae meri zist ki sham

hayat waqf ho jab din shumar karne tak

mere qabile ka 'mohsin' ye qaul-e-faisal hai

ki zulm zulm hai sabr iKHtiyar karne tak