bana gaya hai bayaban ka baghban mujhko

banā gayā hai bayābāñ kā bāġhbāñ mujh ko

rulā gayā hai sitam-zarf āsmāñ mujh ko

mile haiñ ashk-e-ravāñ nāla-o-fuġhāñ fariyād

diyā hai haa.e ye sab tū ne mehrbāñ mujh ko

diyā hai tum ne hī ilzām bevafā.ī kā

sitam hai tum ne hī samjhā hai bad-gumāñ mujh ko

maiñ miT gayā bhī to merā vajūd qaa.em hai

na samjhe phir koī be-nām-o-be-nishāñ mujh ko

na jaane kaun sī shai se chhuā gayā huuñ maiñ

ki DhūñDhtī hī rahī gard-e-kārvāñ mujh ko

qafas nasīb huuñ tanhā.ī hai añdherā hai

har ek samt nazar aa.e hai dhuāñ mujh ko

fanā kī zad se huuñ bāhar ye jāntā huuñ maiñ

hayāt mil ga.ī hai jab ki jāvedāñ mujh ko

na jaane kyoñ mire naqsh-e-qadam se nafrat thī

miTā ke rakh diyā dekhā jahāñ-jahāñ mujh ko

vo gulsitāñ ki jahāñ jal gayā dil-e-mahzūñ

pukārtā hai vahāñ apnā āshiyāñ mujh ko

bahār aziiz hai vo kahte haiñ magar mujh ko

azīz-tar hai 'shafaq' mausam-e-ḳhizāñ mujh ko

bana gaya hai bayaban ka baghban mujh ko

rula gaya hai sitam-zarf aasman mujh ko

mile hain ashk-e-rawan nala-o-fughan fariyaad

diya hai hae ye sab tu ne mehrban mujh ko

diya hai tum ne hi ilzam bewafai ka

sitam hai tum ne hi samjha hai bad-guman mujh ko

main miT gaya bhi to mera wajud qaem hai

na samjhe phir koi be-nam-o-be-nishan mujh ko

na jaane kaun si shai se chhua gaya hun main

ki DhunDhti hi rahi gard-e-karwan mujh ko

qafas nasib hun tanhai hai andhera hai

har ek samt nazar aae hai dhuan mujh ko

fana ki zad se hun bahar ye jaanta hun main

hayat mil gai hai jab ki jawedan mujh ko

na jaane kyon mere naqsh-e-qadam se nafrat thi

miTa ke rakh diya dekha jahan-jahan mujh ko

wo gulsitan ki jahan jal gaya dil-e-mahzun

pukarta hai wahan apna aashiyan mujh ko

bahaar aziz hai wo kahte hain magar mujh ko

aziz-tar hai 'shafaq' mausam-e-KHizan mujh ko