bana kar saneha koi tamasha ye karaata hai

banā kar sāneha koī tamāshā ye karātā hai

falak ma.asūm logoñ ko bahut aañsū rulātā hai

maiñ dil kī laash par nauha-kunāñ huuñ aur tū zālim

bulā kar shahr-dāroñ ko mirā chehra dikhātā hai

are had ho chukī bas be-hisī ye ahl-e-masnad kī

sar-e-bāzār lāshoñ kī koī bolī lagātā hai

yahāñ chaltā hai mere shahr meñ qānūn jañgal kā

yahāñ har memana koī darinda kaaT khātā hai

tujhe ma.alūm bhī hai ye nagar hai zulm-zādoñ kā

hai anqā adl yaañ zanjīr kis ḳhātir hilātā hai

use aatī faqat hai masnad-e-jāñ par ḳhud-ārā.ī

vo fāriġh baiTh kar bas ḳhālī taqrīreñ banātā hai

mire maulā mire bachchoñ ko rakh apne amaañ meñ tū

ki 'ādil' vaqt kā hālat pe merī muskurātā hai

bana kar saneha koi tamasha ye karaata hai

falak masum logon ko bahut aansu rulata hai

main dil ki lash par nauha-kunan hun aur tu zalim

bula kar shahr-daron ko mera chehra dikhata hai

are had ho chuki bas be-hisi ye ahl-e-masnad ki

sar-e-bazar lashon ki koi boli lagata hai

yahan chalta hai mere shahr mein qanun jangal ka

yahan har memana koi darinda kaT khata hai

tujhe malum bhi hai ye nagar hai zulm-zadon ka

hai anqa adl yan zanjir kis KHatir hilata hai

use aati faqat hai masnad-e-jaan par KHud-arai

wo farigh baiTh kar bas KHali taqriren banata hai

mere maula mere bachchon ko rakh apne aman mein tu

ki 'adil' waqt ka haalat pe meri muskuraata hai