bana ke apne safine ka naKHuda mujhko

banā ke apne safīne kā nāḳhudā mujh ko

kisī ne kar diyā tūfāñ se āshnā mujh ko

maiñ ek sang-e-sar-afganda tū hai sang-tarāsh

sutūn-e-ka.aba banā yā sanam banā mujh ko

maiñ ḳhud-ġharaz huuñ kisī kā nahīñ huuñ apne sivā

zamāna hai ki samajhtā hai āshnā mujh ko

tumhārā shahr gulistāñ sahī magar is meñ

mile haiñ ḳhuun ke dhabbe bhī jā-ba-jā mujh ko

maiñ zindagī se bahut kuchh mutālba kartā

tirī nigāh ne ḳhāmosh kar diyā mujh ko

nigāh-e-shauq hī behtar hai iltijā ke liye

zabāñ khulegī to samjheñge vo gadā mujh ko

vo bad-nasīb musāfir huuñ rāh-e-hastī kā

na rāhzan hī mayassar na rahnumā mujh ko

gilā nahīñ mujhe 'ehsāñ' tahī sahī dāman

ye kam nahīñ ki milā dast-e-be-duā mujh ko

bana ke apne safine ka naKHuda mujh ko

kisi ne kar diya tufan se aashna mujh ko

main ek sang-e-sar-afganda tu hai sang-tarash

sutun-e-kaba bana ya sanam bana mujh ko

main KHud-gharaz hun kisi ka nahin hun apne siwa

zamana hai ki samajhta hai aashna mujh ko

tumhaara shahr gulistan sahi magar is mein

mile hain KHun ke dhabbe bhi ja-ba-ja mujh ko

main zindagi se bahut kuchh mutalba karta

teri nigah ne KHamosh kar diya mujh ko

nigah-e-shauq hi behtar hai iltija ke liye

zaban khulegi to samjhenge wo gada mujh ko

wo bad-nasib musafir hun rah-e-hasti ka

na rahzan hi mayassar na rahnuma mujh ko

gila nahin mujhe 'ehsan' tahi sahi daman

ye kam nahin ki mila dast-e-be-dua mujh ko