bana leta main tujhko ham-safar kuchh sal pahle tak

banā letā maiñ tujh ko ham-safar kuchh saal pahle tak

magar is baat se lagtā thā Dar kuchh saal pahle tak

mujhe fikr-e-ma.īshat thī tujhe ḳhauf-e-judā.ī thā

alag the zāviya-hā-e-nazar kuchh saal pahle tak

maiñ nādāñ thā use apne tasarruf meñ nahīñ laayā

bahut nazdīk thī shāḳh-e-samar kuchh saal pahle tak

tirī darvesh-āñkhoñ kā irādat-mand ban jaatā

tū mujh ko mil ga.ī hotī agar kuchh saal pahle tak

inheñ chun chun ke tere ishq kā īñdhan banā detā

ye māh-o-sāl saale the kidhar kuchh saal pahle tak

tire gāloñ ke Dimple meñ nigāheñ Duub jaatī thiiñ

lahū meñ raqs karte the bhañvar kuchh saal pahle tak

mujhe 'yāvar-azīm' ab tak vo āñkheñ yaad aatī haiñ

maiñ un palkoñ ke thā zer-e-asar kuchh saal pahle tak

bana leta main tujh ko ham-safar kuchh sal pahle tak

magar is baat se lagta tha Dar kuchh sal pahle tak

mujhe fikr-e-maishat thi tujhe KHauf-e-judai tha

alag the zawiya-ha-e-nazar kuchh sal pahle tak

main nadan tha use apne tasarruf mein nahin laya

bahut nazdik thi shaKH-e-samar kuchh sal pahle tak

teri darwesh-ankhon ka iradat-mand ban jata

tu mujh ko mil gai hoti agar kuchh sal pahle tak

inhen chun chun ke tere ishq ka indhan bana deta

ye mah-o-sal sale the kidhar kuchh sal pahle tak

tere galon ke Dimple mein nigahen Dub jati thin

lahu mein raqs karte the bhanwar kuchh sal pahle tak

mujhe 'yawar-azim' ab tak wo aankhen yaad aati hain

main un palkon ke tha zer-e-asar kuchh sal pahle tak