banaya tha KHirad ko rahnuma-e-karwan humne

banāyā thā ḳhirad ko rahnumā-e-kārvāñ ham ne

kahāñ kī manzil apnā bhī na paayā kuchh nishāñ ham ne

tasavvur kā takalluf bhī na rakkhā darmiyāñ ham ne

hijāboñ kā miTā kar rakh diyā nām-o-nishāñ ham ne

vahāñ rūdād-e-ġham palkoñ pe aa kar kah ga.e aañsū

jahāñ kholī na pās-e-zabt se apnī zabāñ ham ne

tujhe kyoñ dushmanī hai bāġhbāñ in chand tinkoñ se

banāyā hai tire gulshan se haT kar āshiyāñ ham ne

karishma hai kisī ke husn kī sehrr-āfrīnī kā

ḳhizāñ ke bhes meñ paayā bahāroñ ko nihāñ ham ne

rah-e-hastī kī zulmat meñ judā jab ho ga.e rahbar

banāyā jazb-e-dil ko rahnumā-e-kārvāñ ham ne

ġhulāmī ke añdhere chhaT ga.e muddat huī lekin

na dekhā mehr-e-āzādī ko ab tak zau-fishāñ ham ne

kiyā duniyā meñ ham ne aam dastūr-e-vafā 'sābir'

sikhā.ī ahl-e-ālam ko mohabbat kī zabāñ ham ne

banaya tha KHirad ko rahnuma-e-karwan hum ne

kahan ki manzil apna bhi na paya kuchh nishan hum ne

tasawwur ka takalluf bhi na rakkha darmiyan hum ne

hijabon ka miTa kar rakh diya nam-o-nishan hum ne

wahan rudad-e-gham palkon pe aa kar kah gae aansu

jahan kholi na pas-e-zabt se apni zaban hum ne

tujhe kyon dushmani hai baghban in chand tinkon se

banaya hai tere gulshan se haT kar aashiyan hum ne

karishma hai kisi ke husn ki sehrr-afrini ka

KHizan ke bhes mein paya bahaaron ko nihan hum ne

rah-e-hasti ki zulmat mein juda jab ho gae rahbar

banaya jazb-e-dil ko rahnuma-e-karwan hum ne

ghulami ke andhere chhaT gae muddat hui lekin

na dekha mehr-e-azadi ko ab tak zau-fishan hum ne

kiya duniya mein hum ne aam dastur-e-wafa 'sabir'

sikhai ahl-e-alam ko mohabbat ki zaban hum ne