band-e-gham mushkil se mushkil-tar khula

band-e-ġham mushkil se mushkil-tar khulā

ham se jab koī parī-paikar khulā

mil ga.ī vahshī ko saudā se najāt

dar khulā dīvār meñ yā sar khulā

jāñ-sitānī ke na.e andāz haiñ

haath meñ ġhamze ke hai ḳhanjar khulā

merī vahshat ne nikāle jab se paañv

ek sahrā sahn ke andar khulā

dekhne meñ vo nigāh-e-lutf thī

kis se pūchheñ zaḳhm-e-dil kyūñkar khulā

koī jaada hai na manzil hai koī

sab fareb-e-rāhī-o-rahbar khulā

hai qayāmat us kī mizhgāñ kā ḳhayāl

rakh diyā hai dil meñ ik nashtar khulā

ye zuleḳhā.i! ki yūsuf ke liye

misr kā bāzār hai ghar ghar khulā

nau-umīdī se bañdhī 'tābish' umiid

abr-e-ġham dil par bahut ghir kar khulā

band-e-gham mushkil se mushkil-tar khula

hum se jab koi pari-paikar khula

mil gai wahshi ko sauda se najat

dar khula diwar mein ya sar khula

jaan-sitani ke nae andaz hain

hath mein ghamze ke hai KHanjar khula

meri wahshat ne nikale jab se panw

ek sahra sahn ke andar khula

dekhne mein wo nigah-e-lutf thi

kis se puchhen zaKHm-e-dil kyunkar khula

koi jada hai na manzil hai koi

sab fareb-e-rahi-o-rahbar khula

hai qayamat us ki mizhgan ka KHayal

rakh diya hai dil mein ek nashtar khula

ye zuleKHai! ki yusuf ke liye

misr ka bazar hai ghar ghar khula

nau-umidi se bandhi 'tabish' umid

abr-e-gham dil par bahut ghir kar khula