band hai aaj bhi tarsil pe rah-e-alfaz

band hai aaj bhī tarsīl pe rāh-e-alfāz

maiñ ki mazmūn huuñ phir bhī huuñ tabāh-e-alfāz

aaj aurāq-navardī hai muqaddar lekin

kal mo.arriḳh mujhe Tahrā.egā shāh-e-alfāz

kaash mafhūm-gazīda koī patthar hī mile

sañg-zāroñ meñ bhaTaktī hai nigāh-e-alfāz

log samjheñge na jāneñge mirī baat magar

mere sar aa.egā phir bhī ye gunāh-e-alfāz

huuñ vo mafhūm jo sharminda-e-tahrīr nahīñ

hai panāhoñ meñ mirī ḳhud hī panāh-e-alfāz

bar-sar-e-jañg huuñ tarsīl ke maidāñ meñ 'ra.īs'

qaid-e-ib.hām meñ hai phir bhī sabāh-e-alfāz

band hai aaj bhi tarsil pe rah-e-alfaz

main ki mazmun hun phir bhi hun tabah-e-alfaz

aaj auraq-nawardi hai muqaddar lekin

kal moarriKH mujhe Tahraega shah-e-alfaz

kash mafhum-gazida koi patthar hi mile

sang-zaron mein bhaTakti hai nigah-e-alfaz

log samjhenge na jaanenge meri baat magar

mere sar aaega phir bhi ye gunah-e-alfaz

hun wo mafhum jo sharminda-e-tahrir nahin

hai panahon mein meri KHud hi panah-e-alfaz

bar-sar-e-jang hun tarsil ke maidan mein 'rais'

qaid-e-ibham mein hai phir bhi sabah-e-alfaz