banda to huzur aap ke kaam aaya bahut hai

bandā to huzūr aap ke kaam aaya bahut hai

ye bhī hai bajā aap ne Thukrāyā bahut hai

ulfat hai ki hai dil-lagī mujh ko nahīñ ma.alūm

phir chāñd mujhe dekh ke muskāyā bahut hai

duniyā mujhe suulī pe chaḌhā de to chaḌhā de

ulfat kā sabaq maiñ ne bhī dohrāyā bahut hai

ye baat bajā kī hai madad shukriyā sāhib

ehsān magar aap ne jatlāyā bahut hai

gum-sum sā ka.ī roz se dikhtā hai vo zālim

shāyad mirā dil toḌ ke pachhtāyā bahut hai

ḳhud kī bhī kabhī shakl zarā dekh leñ sāhib

ā.īnā mujhe aap ne dikhlāyā bahut hai

ab aql kā dushman jo na samjhe to na samjhe

maiñ ne dil-e-nādān ko samjhāyā bahut hai

afsos nahīñ qatl kā mujh ko mire qātil

ġham hai yahī tū ne mujhe taḌpāyā bahut hai

īmān o dharam taak pe dekho to 'akelā'

paise ke liye aadmī paglāyā bahut hai

banda to huzur aap ke kaam aaya bahut hai

ye bhi hai baja aap ne Thukraya bahut hai

ulfat hai ki hai dil-lagi mujh ko nahin malum

phir chand mujhe dekh ke muskaya bahut hai

duniya mujhe suli pe chaDha de to chaDha de

ulfat ka sabaq main ne bhi dohraya bahut hai

ye baat baja ki hai madad shukriya sahib

ehsan magar aap ne jatlaya bahut hai

gum-sum sa kai roz se dikhta hai wo zalim

shayad mera dil toD ke pachhtaya bahut hai

KHud ki bhi kabhi shakl zara dekh len sahib

aaina mujhe aap ne dikhlaya bahut hai

ab aql ka dushman jo na samjhe to na samjhe

main ne dil-e-nadan ko samjhaya bahut hai

afsos nahin qatl ka mujh ko mere qatil

gham hai yahi tu ne mujhe taDpaya bahut hai

iman o dharam tak pe dekho to 'akela'

paise ke liye aadmi paglaya bahut hai