bandagi ki lazzaton se aashna ho jaiye

bandagī kī lazzatoñ se āshnā ho jā.iye

ḳhud ko gar pahchāniye to kyā se kyā ho jā.iye

hāl-e-bismil dekh kar mashq-e-sitam nāvak-fagan

ishq kā to izn hī ye hai fanā ho jā.iye

in vafāoñ par bhī aisī sard-mehrī al-amāñ

banda-parvar jā.iye achchhā ḳhafā ho jā.iye

dard-e-dil ne rāz-dār-e-har-do-ālam kar diyā

ḳhaak ko ye fikr hai ab aur kyā ho jā.iye

maiñ vafā par apnī qaa.em huuñ to kyoñ ye be-ruḳhī

aap bhī ab mā.il-e-zauq-e-jafā ho jā.iye

ab to ik ik saañs par hai ḳhatra-e-tauhīn-e-ishq

mere dil kī zid ye hai vaqf-e-duā ho jā.iye

haa.e qadmoñ par jabīñ-sā.ī kī lazzat ai 'bashīr'

shauq-e-pā-bosī meñ un kī ḳhāk-e-pā ho jā.iye

bandagi ki lazzaton se aashna ho jaiye

KHud ko gar pahchaniye to kya se kya ho jaiye

haal-e-bismil dekh kar mashq-e-sitam nawak-fagan

ishq ka to izn hi ye hai fana ho jaiye

in wafaon par bhi aisi sard-mehri al-aman

banda-parwar jaiye achchha KHafa ho jaiye

dard-e-dil ne raaz-dar-e-har-do-alam kar diya

KHak ko ye fikr hai ab aur kya ho jaiye

main wafa par apni qaem hun to kyon ye be-ruKHi

aap bhi ab mail-e-zauq-e-jafa ho jaiye

ab to ek ek sans par hai KHatra-e-tauhin-e-ishq

mere dil ki zid ye hai waqf-e-dua ho jaiye

hae qadmon par jabin-sai ki lazzat ai 'bashir'

shauq-e-pa-bosi mein un ki KHak-e-pa ho jaiye