bane na baat to izhaar-e-muddaa kya hai

bane na baat to iz.hār-e-mudda.ā kyā hai

jo manziloñ pe na pahuñche vo rāsta kyā hai

huā jo ġharq safīna pahuñch ke sāhil par

to nāḳhudā ko pata chal gayā ḳhudā kyā hai

isī se dahr ne paayā surāġh manzil kā

charāġh-e-rāh kyā hai merā naqsh-e-pā kyā hai

sukūñ kī chhāñv mayassar na pyaar kā saaya

hayāt ek kaḌī dhuup ke sivā kyā hai

qarīb se vo guzar jaa.e ajnabī kī tarah

maiñ sochtā huuñ ki is se baḌī sazā kyā hai

vo shaḳhs jis kī nazākat pe log marte haiñ

diloñ ko toḌ diyā us ne aa.ina kyā hai

tasavvur-e-ġham-e-jānāñ kā rāsta roke

'majīd' gardish-e-daurāñ kā hausla kyā hai

bane na baat to izhaar-e-muddaa kya hai

jo manzilon pe na pahunche wo rasta kya hai

hua jo gharq safina pahunch ke sahil par

to naKHuda ko pata chal gaya KHuda kya hai

isi se dahr ne paya suragh manzil ka

charagh-e-rah kya hai mera naqsh-e-pa kya hai

sukun ki chhanw mayassar na pyar ka saya

hayat ek kaDi dhup ke siwa kya hai

qarib se wo guzar jae ajnabi ki tarah

main sochta hun ki is se baDi saza kya hai

wo shaKHs jis ki nazakat pe log marte hain

dilon ko toD diya us ne aaina kya hai

tasawwur-e-gham-e-jaanan ka rasta roke

'majid' gardish-e-dauran ka hausla kya hai