banti hai din mein duniya aksar nigar-KHana

bantī hai din meñ duniyā aksar nigār-ḳhāna

phirtā hai jab nazar meñ guzrā huā zamāna

fard-e-amal na dikhlā kyoñ mujh ko yaad aa.e

guzrā huā zamāna bhūlā huā fasāna

sar ko qafas pe rakkhe sayyād kah rahā hai

bulbul kī jaan niklā ujḌā sā āshiyāna

un par paḌī to aise taḌpe ki phir na sañbhle

kahte the jo yahī hai duniyā kā kār-ḳhāna

ab bāġhbāñ bhī aksar hasrat se dekhtā hai

hai yādgār-e-bulbul sunsān āshiyāna

jallād tere sadqe qismat se mil gayā tū

muddat se DhūñDhtī thī merī ajal bahāna

ik lā-javāb hastī sajdoñ meñ miT chukī thī

phir qibla kyoñ na bantā 'beḳhud' kā āstāna

putlī jo phir chalī thī 'beḳhud' to ban chalā thā

chhuTtā huā zamāna miTtā huā zamāna

banti hai din mein duniya aksar nigar-KHana

phirta hai jab nazar mein guzra hua zamana

fard-e-amal na dikhla kyon mujh ko yaad aae

guzra hua zamana bhula hua fasana

sar ko qafas pe rakkhe sayyaad kah raha hai

bulbul ki jaan nikla ujDa sa aashiyana

un par paDi to aise taDpe ki phir na sanbhle

kahte the jo yahi hai duniya ka kar-KHana

ab baghban bhi aksar hasrat se dekhta hai

hai yaadgar-e-bulbul sunsan aashiyana

jallad tere sadqe qismat se mil gaya tu

muddat se DhunDhti thi meri ajal bahana

ek la-jawab hasti sajdon mein miT chuki thi

phir qibla kyon na banta 'beKHud' ka aastana

putli jo phir chali thi 'beKHud' to ban chala tha

chhuTta hua zamana miTta hua zamana