barasti aag mein ghar se nikal ke dekhte hain

barastī aag meñ ghar se nikal ke dekhte haiñ

ham aaj mom kī sūrat pighal ke dekhte haiñ

maqām-e-shukr hai is daur meñ bhī ahl-e-nazar

adab ke chehre pe jugnū ġhazal ke dekhte haiñ

hazār ham pe kare tanz dil kā ā.īna

na.e zamāna ke sāñche meñ Dhal ke dekhte haiñ

hamārī maañ hameñ pahchāntī hai yā ki nahīñ

vatan kī aag ko chehre pe mal ke dekhte haiñ

dimāġh apne makāñ kā bhī aaj gaḌbaḌ hai

mizāj shahr kī saḌkoñ kā chal ke dekhte haiñ

nasheb vaale jise sar uThā ke dekhte the

nishān miTte usī al-jabal ke dekhte haiñ

safar hayāt kā ik samt ho chukā hai bahut

'shafaq' train kī paTrī badal ke dekhte haiñ

barasti aag mein ghar se nikal ke dekhte hain

hum aaj mom ki surat pighal ke dekhte hain

maqam-e-shukr hai is daur mein bhi ahl-e-nazar

adab ke chehre pe jugnu ghazal ke dekhte hain

hazar hum pe kare tanz dil ka aaina

nae zamana ke sanche mein Dhal ke dekhte hain

hamari man hamein pahchanti hai ya ki nahin

watan ki aag ko chehre pe mal ke dekhte hain

dimagh apne makan ka bhi aaj gaDbaD hai

mizaj shahr ki saDkon ka chal ke dekhte hain

nasheb wale jise sar uTha ke dekhte the

nishan miTte usi al-jabal ke dekhte hain

safar hayat ka ek samt ho chuka hai bahut

'shafaq' train ki paTri badal ke dekhte hain