barg pile kya hue shor-e-KHizan uThne laga

barg piile kyā hue shor-e-ḳhizāñ uThne lagā

be-sharar hī sīna-e-gul se dhuāñ uThne lagā

naam par ham ko tahaffuz ke mile itne fareb

dhīre dhīre e.atibār-e-āsmāñ uThne lagā

rahmateñ shāyad ki ham se bhī gurezāñ ho ga.iiñ

varna kyoñ is shahr se amn-o-amāñ uThne lagā

kah ke dīvāna mujhe duniyā ne rusvā kar diyā

aañkh se jab parda-e-vahm-o-gumāñ uThne lagā

baT ga.ī ik din jazīroñ meñ hamārī zindagī

aur kahānī se shu.ūr-e-dāstāñ uThne lagā

kaash pahle jāgte to dhuup meñ jalte na ham

niiñd jab TuuTī ki sar se sā.ebāñ uThne lagā

aag phir lagne lagī nafrat kī shahroñ meñ 'niyāz'

dekhiye chāroñ taraf phir se dhuāñ uThne lagā

barg pile kya hue shor-e-KHizan uThne laga

be-sharar hi sina-e-gul se dhuan uThne laga

nam par hum ko tahaffuz ke mile itne fareb

dhire dhire eatibar-e-asman uThne laga

rahmaten shayad ki hum se bhi gurezan ho gain

warna kyon is shahr se amn-o-aman uThne laga

kah ke diwana mujhe duniya ne ruswa kar diya

aankh se jab parda-e-wahm-o-guman uThne laga

baT gai ek din jaziron mein hamari zindagi

aur kahani se shuur-e-dastan uThne laga

kash pahle jagte to dhup mein jalte na hum

nind jab TuTi ki sar se saeban uThne laga

aag phir lagne lagi nafrat ki shahron mein 'niyaz'

dekhiye chaaron taraf phir se dhuan uThne laga