barham-kun-e-dil yun kabhi barham na hua tha

barham-kun-e-dil yuuñ kabhī barham na huā thā

hairat-asar aisā mirā aalam na huā thā

un shoḳh nigāhoñ ne taḌap aur baḌhā dī

allāh abhī dard-e-jigar kam na huā thā

ab bhī mujhe ḳhuddārī-e-jānāñ meñ nahīñ shak

pahle bhī mirā dil mutavahham na huā thā

ai pīr-e-muġhāñ us kī baqā meñ mujhe shak hai

vāqif asar-e-jām se kyā jam na huā thā

vo shoḳh mujhe dekh ke yuuñ sharm se jhuk jaa.e

jis kā sar-e-maġhrūr kabhī ḳham na huā thā

is kam-nigahī ne to mujhe maar hī Daalā

aisā asar ai pursish-e-paiham na huā thā

mash.hūr vo 'manzūr' hai jis ke liye kal tak

sarmā-e-shohrat hī farāham na huā thā

barham-kun-e-dil yun kabhi barham na hua tha

hairat-asar aisa mera aalam na hua tha

un shoKH nigahon ne taDap aur baDha di

allah abhi dard-e-jigar kam na hua tha

ab bhi mujhe KHuddari-e-jaanan mein nahin shak

pahle bhi mera dil mutawahham na hua tha

ai pir-e-mughan us ki baqa mein mujhe shak hai

waqif asar-e-jam se kya jam na hua tha

wo shoKH mujhe dekh ke yun sharm se jhuk jae

jis ka sar-e-maghrur kabhi KHam na hua tha

is kam-nigahi ne to mujhe mar hi Dala

aisa asar ai pursish-e-paiham na hua tha

mashhur wo 'manzur' hai jis ke liye kal tak

sarma-e-shohrat hi faraham na hua tha