barham-zan-e-shiraaza-e-ayyam hamin hain

barham-zan-e-shīrāza-e-ayyām hamīñ haiñ

ai dard-e-mohabbat tirā anjām hamīñ haiñ

is qāfila-e-shauq meñ ye vahm hai sab ko

āvāra-o-sar-gashta-o-nākām hamīñ haiñ

hoñge ka.ī gardan-zadanī aur bhī lekin

is shahr-e-nigārāñ meñ to badnām hamīñ haiñ

ham dhuup meñ tapte to panap jaate magar ab

daryūza-gar-e-mehr-e-lab-e-bām hamīñ haiñ

kyā aan thī nākāmī-e-tadbīr se pahle

ab lā.eq-e-fahmā.ish-e-dushnām hamīñ haiñ

haq naqd-e-masarrat kā agar hai to hamīñ ko

kuchh nabz-shanās-e-ġham-o-ālām hamīñ haiñ

jis tak koī koī abhī pahuñchā hī nahīñ hai

vo mash.al-e-be-nūr sar-e-shām hamīñ haiñ

inkār hī sar-chashma-e-īmān-o-yaqīñ hai

ab roz-e-jazā lā.eq-e-in.ām hamīñ haiñ

kaliyoñ se dam-e-sub.h jo 'zaidī' ne sunā thā

fitrat kā vo nā-gufta sā paiġhām hamīñ haiñ

barham-zan-e-shiraaza-e-ayyam hamin hain

ai dard-e-mohabbat tera anjam hamin hain

is qafila-e-shauq mein ye wahm hai sab ko

aawara-o-sar-gashta-o-nakaam hamin hain

honge kai gardan-zadani aur bhi lekin

is shahr-e-nigaran mein to badnam hamin hain

hum dhup mein tapte to panap jate magar ab

daryuza-gar-e-mehr-e-lab-e-baam hamin hain

kya aan thi nakaami-e-tadbir se pahle

ab laeq-e-fahmaish-e-dushnam hamin hain

haq naqd-e-masarrat ka agar hai to hamin ko

kuchh nabz-shanas-e-gham-o-alam hamin hain

jis tak koi koi abhi pahuncha hi nahin hai

wo mashal-e-be-nur sar-e-sham hamin hain

inkar hi sar-chashma-e-iman-o-yaqin hai

ab roz-e-jaza laeq-e-inam hamin hain

kaliyon se dam-e-subh jo 'zaidi' ne suna tha

fitrat ka wo na-gufta sa paigham hamin hain