barmala husn-e-dil-awez ka qissa na suna

barmalā husn-e-dil-āvez kā qissa na sunā

chāk-e-dāman na dikhā 'uzr-e-zulaiḳhā na sunā

qābil-e-zikr mohabbat ke bahut se ruḳh haiñ

kār-e-vahshat ke sivā aur koī afsāna sunā

vaqt tezī se guzartā hai par aisā bhī bhī nahīñ

aaj kahtā hai bahut qissa-e-fardā na sunā

ā.ina-rū koī tā'bīr zarā dikhlā de

taaki pahchān luuñ us ko jise dekhā na sunā

kab se huuñ gosh-bar-āvāz tirī mahfil meñ

yaar dildār bas ab shikva-e-bejā na sunā

kal talak shor-e-anādil thā chaman meñ vaañ aaj

ik qayāmat se koī dil bhī dhaḌaktā na sunā

kisī jānib se chale 'rāhī' havā-e-namnāk

chāragar zikr-e-tunuk-ābī-e-dariyā na sunā

barmala husn-e-dil-awez ka qissa na suna

chaak-e-daman na dikha 'uzr-e-zulaiKHa na suna

qabil-e-zikr mohabbat ke bahut se ruKH hain

kar-e-wahshat ke siwa aur koi afsana suna

waqt tezi se guzarta hai par aisa bhi bhi nahin

aaj kahta hai bahut qissa-e-farda na suna

aaina-ru koi ta'bir zara dikhla de

taki pahchan lun us ko jise dekha na suna

kab se hun gosh-bar-awaz teri mahfil mein

yar dildar bas ab shikwa-e-beja na suna

kal talak shor-e-anadil tha chaman mein wan aaj

ek qayamat se koi dil bhi dhaDakta na suna

kisi jaanib se chale 'rahi' hawa-e-namnak

chaaragar zikr-e-tunuk-abi-e-dariya na suna