barq-e-ulfat jo tajalli se jalane nikle

barq-e-ulfat jo tajallī se jalāne nikle

to sar-e-rāh mohabbat ke fasāne nikle

kal zamāne ko sunā.eñge ye ġhazleñ merī

aaj jo haiñ mirī āvāz dabāne nikle

har nazāre meñ numāyāñ huā jalva un kā

husn jab husn-parastoñ se chhupāne nikle

aaj maare ga.e vo apnī anā ke hāthoñ

jab mujhe barsar-e-maidān bachāne nikle

bā-ḳhudā jaan se jā.eñge ye duniyā vaale

dard-e-dil ham jo unheñ apnā sunāne nikle

ek lamha thā tire vasl kā lamha is meñ

tū na samjhegā mire kitne zamāne nikle

us ko raġhbat thī na.e tarz-e-mohabbat se baḌī

mere andāz-e-mohabbat bhī purāne nikle

jab vo goyā huā tab us kī zabāñ se 'haidar'

tark-e-ulfat ke bhī kyā kyā na bahāne nikle

barq-e-ulfat jo tajalli se jalane nikle

to sar-e-rah mohabbat ke fasane nikle

kal zamane ko sunaenge ye ghazlen meri

aaj jo hain meri aawaz dabane nikle

har nazare mein numayan hua jalwa un ka

husn jab husn-paraston se chhupane nikle

aaj mare gae wo apni ana ke hathon

jab mujhe barsar-e-maidan bachane nikle

ba-KHuda jaan se jaenge ye duniya wale

dard-e-dil hum jo unhen apna sunane nikle

ek lamha tha tere wasl ka lamha is mein

tu na samjhega mere kitne zamane nikle

us ko raghbat thi nae tarz-e-mohabbat se baDi

mere andaz-e-mohabbat bhi purane nikle

jab wo goya hua tab us ki zaban se 'haidar'

tark-e-ulfat ke bhi kya kya na bahane nikle