barq kahte hain kise kis ko sharar kahte hain

barq kahte haiñ kise kis ko sharar kahte haiñ

jānte ho jise āshiq kā jigar kahte haiñ

marhabā sall-e-alā zaḳhm-e-jigar kahte haiñ

chashm-e-bad-dūr isī ko to nazar kahte haiñ

aañkh bhar aatī hai jab soz-e-jigar kahte haiñ

ab bhī is aag meñ paanī kā asar kahte haiñ

kuchh vo ghabrā.e se aa kar mire ghar kahte haiñ

kyā isī ko tire nāloñ kā asar kahte haiñ

gor kuchh duur nahīñ fikr-e-masāfat kyā hai

ghar badal lene ko duniyā se safar kahte haiñ

be-ḳhudī ishq kī ye thī ki ḳhabar-dār hue

ibtidā jis kī nahīñ us kī ḳhabar kahte haiñ

phir duā ke liye lab-hā-e-jarāhat vā haiñ

kuchh tirā haqq-e-namak zaḳhm-e-jigar kahte haiñ

kuchh agar kahiye to sunñe nahīñ dete haiñ adū

baat kahne nahīñ dete vo agar kahte haiñ

jhūñTh tūfāñ na uThā abr-e-bahārī pas-e-marg

yaañ tah-e-ḳhāk bhī kuchh dīda-e-tar kahte haiñ

maut māñge se bhī piirī meñ nahīñ aatī hai

bahr-e-maqbūl-e-duā vaqt-e-sahar kahte haiñ

aañkh mujh se bhī jo mil jaa.e to maiñ bhī sun luuñ

kuchh tire tīr-e-nazar dil kī ḳhabar kahte haiñ

haa.e be-rahmī-e-sayyād satāne ko mire

noch kar kahtā hai kyā in ko hī par kahte haiñ

dīda-e-tar meñ bure lagte haiñ ḳhālī aañsū

log aulād ko jab laḳht-e-jigar kahte haiñ

ḳhāksārī se huā rang ye apnā 'sho.ala'

zard miTTī hai nazar meñ jise zar kahte haiñ

barq kahte hain kise kis ko sharar kahte hain

jaante ho jise aashiq ka jigar kahte hain

marhaba sall-e-ala zaKHm-e-jigar kahte hain

chashm-e-bad-dur isi ko to nazar kahte hain

aankh bhar aati hai jab soz-e-jigar kahte hain

ab bhi is aag mein pani ka asar kahte hain

kuchh wo ghabrae se aa kar mere ghar kahte hain

kya isi ko tere nalon ka asar kahte hain

gor kuchh dur nahin fikr-e-masafat kya hai

ghar badal lene ko duniya se safar kahte hain

be-KHudi ishq ki ye thi ki KHabar-dar hue

ibtida jis ki nahin us ki KHabar kahte hain

phir dua ke liye lab-ha-e-jarahat wa hain

kuchh tera haqq-e-namak zaKHm-e-jigar kahte hain

kuchh agar kahiye to sunne nahin dete hain adu

baat kahne nahin dete wo agar kahte hain

jhunTh tufan na uTha abr-e-bahaari pas-e-marg

yan tah-e-KHak bhi kuchh dida-e-tar kahte hain

maut mange se bhi piri mein nahin aati hai

bahr-e-maqbul-e-dua waqt-e-sahar kahte hain

aankh mujh se bhi jo mil jae to main bhi sun lun

kuchh tere tir-e-nazar dil ki KHabar kahte hain

hae be-rahmi-e-sayyaad satane ko mere

noch kar kahta hai kya in ko hi par kahte hain

dida-e-tar mein bure lagte hain KHali aansu

log aulad ko jab laKHt-e-jigar kahte hain

KHaksari se hua rang ye apna 'shoala'

zard miTTi hai nazar mein jise zar kahte hain