barq ke dosh pe phulon ki saf-arai hai

barq ke dosh pe phūloñ kī saf-ārā.ī hai

nudrateñ le ke gulistāñ meñ bahār aa.ī hai

ishq-e-majbūr ne jab husn kī shah paa.ī hai

gardish-e-vaqt bhī majbūr nazar aa.ī hai

raqs meñ jalva-e-be-rang kī ra.anā.ī hai

merī hastī meñ tirī zaat utar aa.ī hai

aur to koī nahīñ chashm-e-tamāshā kā mujīb

ek hairat hai jo ḳhāmosh tamāshā.ī hai

apne qadmoñ ke bharose pe milī hai manzil

vo hī bhaTkā hai jise raah kī yaad aa.ī hai

aaj har sher hai irfān-e-haqīqat 'māhir'

bil-yaqīñ tere taġhazzul kī pazīrā.ī hai

barq ke dosh pe phulon ki saf-arai hai

nudraten le ke gulistan mein bahaar aai hai

ishq-e-majbur ne jab husn ki shah pai hai

gardish-e-waqt bhi majbur nazar aai hai

raqs mein jalwa-e-be-rang ki ranai hai

meri hasti mein teri zat utar aai hai

aur to koi nahin chashm-e-tamasha ka mujib

ek hairat hai jo KHamosh tamashai hai

apne qadmon ke bharose pe mili hai manzil

wo hi bhaTka hai jise rah ki yaad aai hai

aaj har sher hai irfan-e-haqiqat 'mahir'

bil-yaqin tere taghazzul ki pazirai hai