barsat ki jhaDiyon ko tum KHud hi mana lena

barsāt kī jhaḌiyoñ ko tum ḳhud hī manā lenā

jab kuchh na samajh aa.e phir ham ko bulā lenā

ik mauj machal kar jab sāhil se lipaTtī ho

tum tishna nigāhoñ ko dariyā pe jamā lenā

ai chāragaro tum bhī is ġham meñ raho shāmil

dukhte hue zaḳhmoñ kā tum bhī to mazā lenā

sochoñ meñ ḳhayāloñ meñ mahkār sī bhar denā

āñkhoñ ne jo dekhe haiñ vo ḳhvāb churā lenā

likkhe haiñ havāoñ par jo giit judā.ī meñ

un ko kabhī chāhat se hoñToñ pe sajā lenā

jo man meñ dahaktī hai din raat sulagtī hai

us aag ko jazboñ kī rim-jhim se bujhā lenā

kyoñ DhūñDte phirte ho 'sahbā' kī vafāoñ ko

mahke hue jhoñkoñ ko siine se lagā lenā

barsat ki jhaDiyon ko tum KHud hi mana lena

jab kuchh na samajh aae phir hum ko bula lena

ek mauj machal kar jab sahil se lipaTti ho

tum tishna nigahon ko dariya pe jama lena

ai chaaragaro tum bhi is gham mein raho shamil

dukhte hue zaKHmon ka tum bhi to maza lena

sochon mein KHayalon mein mahkar si bhar dena

aankhon ne jo dekhe hain wo KHwab chura lena

likkhe hain hawaon par jo git judai mein

un ko kabhi chahat se honTon pe saja lena

jo man mein dahakti hai din raat sulagti hai

us aag ko jazbon ki rim-jhim se bujha lena

kyon DhunDte phirte ho 'sahba' ki wafaon ko

mahke hue jhonkon ko sine se laga lena