barsegi kis makan mein gham ki ghaTa nahin

barsegī kis makān meñ ġham kī ghaTā nahīñ

is zahr-ḳhez vaqt kā lekin patā nahīñ

har gaam tīrgī kā huā sāmnā mujhe

shāyad mire nasīb meñ lutf-e-ziyā nahīñ

miltā nahīñ ḳhulūs se ye aur baat hai

lekin vo kuchh ḳhulūs se nā-āshnā nahīñ

pāmāl ek din meñ kare laakh koh-e-ġham

ai vaqt terī quvvat-e-bāzū meñ kyā nahīñ

dene lagī fareb guloñ ko bahār bhī

ab sāzgār-e-'ahd chaman kī havā nahīñ

har manzil-e-sitam se maiñ āsāñ guzar gayā

āñdhī meñ bhī charāġh-e-mohabbat bujhā nahīñ

'betāb' jī rahā huuñ yahāñ aur baat hai

lekin maiñ apne aap ko pahchāntā nahīñ

barsegi kis makan mein gham ki ghaTa nahin

is zahr-KHez waqt ka lekin pata nahin

har gam tirgi ka hua samna mujhe

shayad mere nasib mein lutf-e-ziya nahin

milta nahin KHulus se ye aur baat hai

lekin wo kuchh KHulus se na-ashna nahin

pamal ek din mein kare lakh koh-e-gham

ai waqt teri quwwat-e-bazu mein kya nahin

dene lagi fareb gulon ko bahaar bhi

ab sazgar-e-'ahd chaman ki hawa nahin

har manzil-e-sitam se main aasan guzar gaya

aandhi mein bhi charagh-e-mohabbat bujha nahin

'betab' ji raha hun yahan aur baat hai

lekin main apne aap ko pahchanta nahin