bas ab ki yar KHamoshi ki intiha bole

bas ab kī yaar ḳhamoshī kī intihā bole

baḌhe sukūt kuchh itnā ki ḳhud ḳhudā bole

ġhalat hai pūchhnā logoñ se dāstān-e-sitam

zabāñ pe muhr lagī ho to koī kyā bole

bañdheñge band kahāñ āñdhiyoñ kī lahroñ par

kivāḌ khol do aisā na ho havā bole

jo ek ghar ke masā.il sunāne aa.e the

vo shahryār ke aage judā judā bole

sadā-e-pā hai tirī tū nahīñ qarīb magar

falak pe abr nahīñ hai magar ghaTā bole

kisī ko rabt nahīñ hai fan-e-samā.at se

ye haal ho to koī kis qadar bhalā bole

vo mujh se baat kare jab to yuuñ lage 'āsim'

ki āshnā se koī ġhair-āshnā bole

bas ab ki yar KHamoshi ki intiha bole

baDhe sukut kuchh itna ki KHud KHuda bole

ghalat hai puchhna logon se dastan-e-sitam

zaban pe muhr lagi ho to koi kya bole

bandhenge band kahan aandhiyon ki lahron par

kiwaD khol do aisa na ho hawa bole

jo ek ghar ke masail sunane aae the

wo shahryar ke aage juda juda bole

sada-e-pa hai teri tu nahin qarib magar

falak pe abr nahin hai magar ghaTa bole

kisi ko rabt nahin hai fan-e-samaat se

ye haal ho to koi kis qadar bhala bole

wo mujh se baat kare jab to yun lage 'asim'

ki aashna se koi ghair-ashna bole