bas aur kya kahun is silsila mein tauba hai

bas aur kyā kahūñ is silsila meñ tauba hai

mujhe jo pahuñchā hai dukh dostoñ se pahuñchā hai

mire vajūd se hairat meñ hai mufassir-e-aql

vo raaz huuñ jo na mastūr hai na ifshā hai

mujhe hayāt se hai is liye bhī dilchaspī

ye ek din kā nahīñ umr-bhar kā saudā hai

vo tere lutf-e-tabassum kī naġhmagī ai dost

ki jaise qaus-e-quzah par sitār bajtā hai

ye zindagānī ibārat ḳhalish se hai ya.anī

ḳhalish jo hai to chaman hai nahīñ to sahrā hai

haiñ terī ishva-garī ke ye muḳhtalif pahlū

kalīsā kyā hai haram kyā hai but-kada kyā hai

'nazīr' qissa-e-zaḳhm-e-nihāñ kahūñ kis se

ye dāstān-e-alam saḳht rūh-farsā hai

bas aur kya kahun is silsila mein tauba hai

mujhe jo pahuncha hai dukh doston se pahuncha hai

mere wajud se hairat mein hai mufassir-e-aql

wo raaz hun jo na mastur hai na ifsha hai

mujhe hayat se hai is liye bhi dilchaspi

ye ek din ka nahin umr-bhar ka sauda hai

wo tere lutf-e-tabassum ki naghmagi ai dost

ki jaise qaus-e-quzah par sitar bajta hai

ye zindagani ibarat KHalish se hai yani

KHalish jo hai to chaman hai nahin to sahra hai

hain teri ishwa-gari ke ye muKHtalif pahlu

kalisa kya hai haram kya hai but-kada kya hai

'nazir' qissa-e-zaKHm-e-nihan kahun kis se

ye dastan-e-alam saKHt ruh-farsa hai