bas dekhte hi dekhte sadiyan guzar gain

bas dekhte hī dekhte sadiyāñ guzar ga.iiñ

ābādiyāñ pahāḌoñ se nīche utar ga.iiñ

soche hue dinoñ ke badan-dār aa base

phir yuuñ huā ki rāteñ murādoñ se bhar ga.iiñ

bāġhīcha-e-jahān makānoñ se bhar gayā

phir aur des titliyāñ parvāz kar ga.iiñ

ham zindagī sameTte kis tarah shahr meñ

vo intishār thā ki nigāheñ bikhar ga.iiñ

ā.īne jab yaqīn ke be-āb ho ga.e

āñkhoñ se intizār kī parteñ utar ga.iiñ

sab raushnī kī bhūl-bhulayyoñ meñ kho ga.e

jitnī burā.iyāñ thiiñ añdheroñ ke sar ga.iiñ

ham rah ga.e faqīr se ta.abīr pūchhte

fasloñ ke saath TiDDiyāñ sapne bhī char ga.iiñ

ajsām phir utar na sake āsmān se

parchhā.iyāñ zamīn pe be-maut mar ga.iiñ

bas dekhte hi dekhte sadiyan guzar gain

aabaadiyan pahaDon se niche utar gain

soche hue dinon ke badan-dar aa base

phir yun hua ki raaten muradon se bhar gain

baghicha-e-jahan makanon se bhar gaya

phir aur des titliyan parwaz kar gain

hum zindagi sameTte kis tarah shahr mein

wo intishaar tha ki nigahen bikhar gain

aaine jab yaqin ke be-ab ho gae

aankhon se intizar ki parten utar gain

sab raushni ki bhul-bhulayyon mein kho gae

jitni buraiyan thin andheron ke sar gain

hum rah gae faqir se tabir puchhte

faslon ke sath TiDDiyan sapne bhi char gain

ajsam phir utar na sake aasman se

parchhaiyan zamin pe be-maut mar gain