bas ek hijr ke mausam ka rang gahra tha

bas ek hijr ke mausam kā rañg gahrā thā

har ek rut ko chakhā thā barat ke dekhā thā

us ek lamhe meñ kitnī qayāmateñ TūTīñ

bas ek lamhe ko tere asar se niklā thā

koī charāġh bhī raḳht-e-safar meñ rakh lete

safar meñ raat bhī aa.egī ye na sochā thā

ḳhud apne-āp ko chhūne kā hausla na rahā

ki mere jism pe merā hī ḳhuun phailā thā

vo aaj mujh se milā hai to kitnā banjar hai

jo apnī aañkh meñ sāvan ke rañg rakhtā thā

na us kī chhāñv thī merī na phuul the mere

shajar thā sehn meñ apne magar parāyā thā

vo sāhiloñ pe paḌā ab ḳhalā ko taktā hai

jo pāniyoñ meñ utartā thā siip chuntā thā

aTā hai dhuul se kamra hai taaq bhī suunā

kabhī gulāb saje the charāġh jaltā thā

bas ek hijr ke mausam ka rang gahra tha

har ek rut ko chakha tha barat ke dekha tha

us ek lamhe mein kitni qayamaten TuTin

bas ek lamhe ko tere asar se nikla tha

koi charagh bhi raKHt-e-safar mein rakh lete

safar mein raat bhi aaegi ye na socha tha

KHud apne-ap ko chhune ka hausla na raha

ki mere jism pe mera hi KHun phaila tha

wo aaj mujh se mila hai to kitna banjar hai

jo apni aankh mein sawan ke rang rakhta tha

na us ki chhanw thi meri na phul the mere

shajar tha sehn mein apne magar paraya tha

wo sahilon pe paDa ab KHala ko takta hai

jo paniyon mein utarta tha sip chunta tha

aTa hai dhul se kamra hai taq bhi suna

kabhi gulab saje the charagh jalta tha