bas ek un ke hi aane ka intizar hua

bas ek un ke hī aane kā intizār huā

phir is ke baa'd kisī se hameñ na pyaar huā

tumhārī yādoñ kā ġham dil ke ār-pār huā

thā be-qarār ye dil aur be-qarār huā

vo mujh ko chhoḌ ga.e dūsroñ ke kahne par

chalo kisī kī to bātoñ pe e'tibār huā

tamām 'umr yahī baat ab satā.egī

vo pyaar se na mile yā mujhe na pyaar huā

kisī kī jaan ga.ī koī ban gayā qaidī

koī nazar kā koī zulf kā shikār huā

hai baat kuchh to tirī baat meñ bhī ai 'shāriq'

jo un kī bazm meñ terā bhī intizār huā

bas ek un ke hi aane ka intizar hua

phir is ke ba'd kisi se hamein na pyar hua

tumhaari yaadon ka gham dil ke aar-par hua

tha be-qarar ye dil aur be-qarar hua

wo mujh ko chhoD gae dusron ke kahne par

chalo kisi ki to baaton pe e'tibar hua

tamam 'umr yahi baat ab sataegi

wo pyar se na mile ya mujhe na pyar hua

kisi ki jaan gai koi ban gaya qaidi

koi nazar ka koi zulf ka shikar hua

hai baat kuchh to teri baat mein bhi ai 'shaariq'

jo un ki bazm mein tera bhi intizar hua