bas firaq-e-yar mein jari suKHan-araiyan

bas firāq-e-yār meñ jaarī suḳhan-ārā.iyāñ

haa.e ye pur-kaif mausam aur mirī tanhā.iyāñ

bistaroñ kī silvaToñ se laḌ rahe haiñ ham yahāñ

jaane vaalā le rahā hogā kahīñ añgḌā.iyāñ

chhat kī kaḌiyoñ se mirī utre tire kitne ḳhayāl

kyā tirī dīvār par utrīñ mirī parchhā.iyāñ

dil ke mausam se rahā mashrūt har mausam mirā

kyā udāsī kī fazā.eñ kyā koī rā'nā.iyāñ

dard ko mahsūs karne kā salīqa siikh le

dekh hī saktīñ nahīñ ġham ko tirī bīnā.iyāñ

ham ki vāqif haiñ shaqī-ul-qalb 'ārif' se tabhī

hairatī haiñ dekh kar us kī karam-farmā.iyāñ

bas firaq-e-yar mein jari suKHan-araiyan

hae ye pur-kaif mausam aur meri tanhaiyan

bistaron ki silwaTon se laD rahe hain hum yahan

jaane wala le raha hoga kahin angDaiyan

chhat ki kaDiyon se meri utre tere kitne KHayal

kya teri diwar par utrin meri parchhaiyan

dil ke mausam se raha mashrut har mausam mera

kya udasi ki fazaen kya koi ra'naiyan

dard ko mahsus karne ka saliqa sikh le

dekh hi saktin nahin gham ko teri binaiyan

hum ki waqif hain shaqi-ul-qalb 'arif' se tabhi

hairati hain dekh kar us ki karam-farmaiyan