bas ek putla tha miTTi se bana main

bas ik putlā thā miTTī se banā maiñ

karam terā ki kyā se kyā huā maiñ

tirī pahchān jis din se huī hai

huuñ apne aap ko bhūlā huā maiñ

akelā hai agar koī to tū hai

jo tanhā huuñ to huuñ tere sivā maiñ

jo kuchh hotā to shāyad kuchh na hotā

na ho ke kuchh bahut kuchh ho gayā maiñ

hai merī zaat kā 'irfān mushkil

kahīñ patthar kahīñ huuñ devtā maiñ

tumhārā rang jis din se chaḌhā hai

nazar aane lagā sab se judā maiñ

fanā honī hai jab har shai yahāñ kī

to phir kyā chiiz hai tū aur kyā maiñ

ThiThurtī shaam meñ jaltā huā vo

sulagtī raat meñ bujhtā huā maiñ

na.ī rut meñ na.ī thī chaah ham ko

zarā vo bevafā thā aur zarā maiñ

agar is shahr meñ shā'ir hai koī

to pahlā 'nūr' hai aur dūsrā maiñ

bas ek putla tha miTTi se bana main

karam tera ki kya se kya hua main

teri pahchan jis din se hui hai

hun apne aap ko bhula hua main

akela hai agar koi to tu hai

jo tanha hun to hun tere siwa main

jo kuchh hota to shayad kuchh na hota

na ho ke kuchh bahut kuchh ho gaya main

hai meri zat ka 'irfan mushkil

kahin patthar kahin hun dewta main

tumhaara rang jis din se chaDha hai

nazar aane laga sab se juda main

fana honi hai jab har shai yahan ki

to phir kya chiz hai tu aur kya main

ThiThurti sham mein jalta hua wo

sulagti raat mein bujhta hua main

nai rut mein nai thi chah hum ko

zara wo bewafa tha aur zara main

agar is shahr mein sha'ir hai koi

to pahla 'nur' hai aur dusra main