bas ek shua-e-nur se saya simaT gaya

bas ik shuā-e-nūr se saaya simaT gayā

vo paas aa rahā thā ki maiñ duur haT gayā

phir darmiyān-e-aql-o-junūñ jañg chhiḌ ga.ī

phir majma-e-ḳhavāas girohoñ meñ baT gayā

kyā ab bhī terī ḳhātir-e-nāzuk pe baar huuñ

patthar nahīñ ki maiñ tire raste se haT gayā

yā itnā saḳht-jān ki talvār be-asar

yā itnā narm-dil ki rag-e-gul se kaT gayā

vo lamha-e-shu.ūr jise jāñ-kanī kaheñ

chehre se zindagī kī naqābeñ ulaT gayā

ab kaun jaa.e kū-e-malāmat se lauT kar

qadmoñ se aa ke apnā hī saaya lipaT gayā

āḳhir 'shakeb' ḳhū-e-sitam us ne chhoḌ dī

zauq-e-safar ko dekh ke sahrā simaT gayā

bas ek shua-e-nur se saya simaT gaya

wo pas aa raha tha ki main dur haT gaya

phir darmiyan-e-aql-o-junun jang chhiD gai

phir majma-e-KHawaas girohon mein baT gaya

kya ab bhi teri KHatir-e-nazuk pe bar hun

patthar nahin ki main tere raste se haT gaya

ya itna saKHt-jaan ki talwar be-asar

ya itna narm-dil ki rag-e-gul se kaT gaya

wo lamha-e-shuur jise jaan-kani kahen

chehre se zindagi ki naqaben ulaT gaya

ab kaun jae ku-e-malamat se lauT kar

qadmon se aa ke apna hi saya lipaT gaya

aaKHir 'shakeb' KHu-e-sitam us ne chhoD di

zauq-e-safar ko dekh ke sahra simaT gaya