bas is liye tumhein bheja tha likh ke han kaghaz

bas is liye tumheñ bhejā thā likh ke haañ kāġhaz

ki merā haal kare tum se kuchh bayāñ kāġhaz

ḳhudā ke vāste kis tarah pahuñche vaañ kāġhaz

na le ke jā sake jis jā farishta ḳhaañ kāġhaz

abhī likhā bhī na thā hāl-e-sīna-e-pur-dāġh

ki ban gayā yūñhī sad shak-e-gulistāñ kāġhaz

maiñ hāl-e-soz-e-dil apnā likhūñ to kaise likhūñ

hazar hai ḳhāma ko māñge hai al-amāñ kāġhaz

ab is ko kyā karūñ vahāñ tak pahuñch nahīñ saktā

jo ek hai mirā kambaḳht rāzdāñ kāġhaz

samajh ke ḳhat mirā ġhairoñ kā bhī nahīñ letā

ye bad-gumānī hai vo shoḳh bad-gumāñ kāġhaz

jo pahuñche haath tak us māh-rū ke qismat se

to paidā kartā hai ḳhāsiyat-e-katāñ kāġhaz

ḳhudā ke vāste chhup-chhup ke ham se farmāo

ye roz bhejo ho likh likh ke kis ke haañ kāġhaz

likhā jo maiñ ne ki ḳhat ke javāb meñ tum ne

likhā na bhuul ke ham ko kabhī 'ayāñ kāġhaz

to phir ke aap ne qāsid se ye kahā ki yahāñ

kahāñ davāt kahāñ ḳhāma aur kahāñ kāġhaz

na pahuñche 'aish' use ham ne bārhā likhe

hazār-haif ga.e yūñhī rā.egāñ kāġhaz

bas is liye tumhein bheja tha likh ke han kaghaz

ki mera haal kare tum se kuchh bayan kaghaz

KHuda ke waste kis tarah pahunche wan kaghaz

na le ke ja sake jis ja farishta KHan kaghaz

abhi likha bhi na tha haal-e-sina-e-pur-dagh

ki ban gaya yunhi sad shak-e-gulistan kaghaz

main haal-e-soz-e-dil apna likhun to kaise likhun

hazar hai KHama ko mange hai al-aman kaghaz

ab is ko kya karun wahan tak pahunch nahin sakta

jo ek hai mera kambaKHt raazdan kaghaz

samajh ke KHat mera ghairon ka bhi nahin leta

ye bad-gumani hai wo shoKH bad-guman kaghaz

jo pahunche hath tak us mah-ru ke qismat se

to paida karta hai KHasiyat-e-katan kaghaz

KHuda ke waste chhup-chhup ke hum se farmao

ye roz bhejo ho likh likh ke kis ke han kaghaz

likha jo main ne ki KHat ke jawab mein tum ne

likha na bhul ke hum ko kabhi 'ayan kaghaz

to phir ke aap ne qasid se ye kaha ki yahan

kahan dawat kahan KHama aur kahan kaghaz

na pahunche 'aish' use hum ne barha likhe

hazar-haif gae yunhi raegan kaghaz