bas isi baat pe wo shaKHs KHafa hai mujhse

bas isī baat pe vo shaḳhs ḳhafā hai mujh se

shahr meñ tazkira-e-rasm-e-vafā hai mujh se

aksar aksar vahī nārāz huā hai mujh se

jis ko be-vaj.h satā.ish kā gila hai mujh se

ek lamhe ko Thaharne kī sazā maut bhī hai

tez-rau vaqt ne aksar ye kahā hai mujh se

maiñ to huuñ qaid idhar apnī anā ke but meñ

vo vafāoñ kā sila maañg rahā hai mujh se

maiñ ki ḳhud raah meñ bhuul aa.ī huuñ asbāb-e-safar

koī manzil kā patā pūchh rahā hai mujh se

koī bhī qaid-e-musalsal mirī qismat meñ na thī

mere sayyād kā dil TuuT gayā hai mujh se

kaash be-rabt ḳhayāloñ ko bhī de pā.ūñ zabāñ

rishta-e-lafz kahīñ TuuT gayā hai mujh se

'shān' irfān-e-nazar jab se huā hai hāsil

ab koī paas hai mere na judā hai mujh se

bas isi baat pe wo shaKHs KHafa hai mujh se

shahr mein tazkira-e-rasm-e-wafa hai mujh se

aksar aksar wahi naraaz hua hai mujh se

jis ko be-wajh sataish ka gila hai mujh se

ek lamhe ko Thaharne ki saza maut bhi hai

tez-rau waqt ne aksar ye kaha hai mujh se

main to hun qaid idhar apni ana ke but mein

wo wafaon ka sila mang raha hai mujh se

main ki KHud rah mein bhul aai hun asbab-e-safar

koi manzil ka pata puchh raha hai mujh se

koi bhi qaid-e-musalsal meri qismat mein na thi

mere sayyaad ka dil TuT gaya hai mujh se

kash be-rabt KHayalon ko bhi de paun zaban

rishta-e-lafz kahin TuT gaya hai mujh se

'shan' irfan-e-nazar jab se hua hai hasil

ab koi pas hai mere na juda hai mujh se