bas-ki KHush-rang nigahon ko uTha sher suna

bas-ki ḳhush-rang nigāhoñ ko uThā sher sunā

aa mire mutrib-e-shab raqs meñ aa sher sunā

ai ki tartīb-o-ta.ayyun meñ chhupī bād-e-shimāl

ai ḳhunuk shaam kī mānūs havā sher sunā

hai ye tashrīh-talab rang-e-chaman bū-e-chaman

shahr-zād aaj kisī baaġh meñ aa sher sunā

haa.e is jism meñ chaḌhtā huā ḳhvāb-āvar ishq

hai rag-o-pai meñ machaltā sā nasha sher sunā

uf vo yaḳh-basta sarāboñ meñ harārat kā fareb

ai fusūñ-lams zarā barf haTā sher sunā

maiñ ki is jhiil kināre pe bhaTaktī huī raat

tū sahar-ḳhez nigah hosh-rubā sher sunā

bas-ki KHush-rang nigahon ko uTha sher suna

aa mere mutrib-e-shab raqs mein aa sher suna

ai ki tartib-o-tayyun mein chhupi baad-e-shimal

ai KHunuk sham ki manus hawa sher suna

hai ye tashrih-talab rang-e-chaman bu-e-chaman

shahr-zad aaj kisi bagh mein aa sher suna

hae is jism mein chaDhta hua KHwab-awar ishq

hai rag-o-pai mein machalta sa nasha sher suna

uf wo yaKH-basta sarabon mein hararat ka fareb

ai fusun-lams zara barf haTa sher suna

main ki is jhil kinare pe bhaTakti hui raat

tu sahar-KHez nigah hosh-ruba sher suna