bas ki mujhse wo sanam in dinon KHafa sa hai

bas ki mujh se vo sanam in dinoñ ḳhafā sā hai

aañkh merī nam sī hai dil mirā bujhā sā hai

ḳhvāhishoñ kī bhiiḌ meñ tū na kho sakā kabhī

intizār meñ tire zaḳhm-e-dil harā sā hai

āñsuoñ kī vo nadī ḳhushk ho chalī magar

tere dard kā shajar aaj bhī harā sā hai

āñdhiyoñ kā ġham nahīñ dhuup kā sitam nahīñ

chāhatoñ ke phuul kā rang kyuuñ uḌā sā hai

kyā yazīd-e-vaqt kī zad pe hai usūl-e-haq

shahr-e-jāñ meñ har taraf shor-e-karbalā sā hai

vo mirī haqīqateñ kar hī detā hai ayaañ

ya.anī terā husn bhī koī aa.ina sā hai

jis tarah bhī chāhiye aap lutf uThā.iye

dard kā fasāna bhī qissa-e-vafā sā hai

us ke pā-e-nāz par kyuuñ na ḳham karūñ jabīñ

merī chashm-e-shauq meñ vo sanam ḳhudā sā hai

us ke saa.e saa.e hī kaT rahī hai zindagī

harf harf vo tirā dhuup meñ ghaTā sā hai

bas ki mujh se wo sanam in dinon KHafa sa hai

aankh meri nam si hai dil mera bujha sa hai

KHwahishon ki bhiD mein tu na kho saka kabhi

intizar mein tere zaKHm-e-dil hara sa hai

aansuon ki wo nadi KHushk ho chali magar

tere dard ka shajar aaj bhi hara sa hai

aandhiyon ka gham nahin dhup ka sitam nahin

chahaton ke phul ka rang kyun uDa sa hai

kya yazid-e-waqt ki zad pe hai usul-e-haq

shahr-e-jaan mein har taraf shor-e-karbala sa hai

wo meri haqiqaten kar hi deta hai ayan

yani tera husn bhi koi aaina sa hai

jis tarah bhi chahiye aap lutf uThaiye

dard ka fasana bhi qissa-e-wafa sa hai

us ke pa-e-naz par kyun na KHam karun jabin

meri chashm-e-shauq mein wo sanam KHuda sa hai

us ke sae sae hi kaT rahi hai zindagi

harf harf wo tera dhup mein ghaTa sa hai