bas wahi wo dikhai dete hain

bas vahī vo dikhā.ī dete haiñ

ek ke do dikhā.ī dete haiñ

jitne harjā.ī ham ne dekhe haiñ

utne kis ko dikhā.ī dete haiñ

vo yahāñ haiñ nahīñ pata hai hameñ

phir bhī ham ko dikhā.ī dete haiñ

dil ko bahlānā hī to maqsad hai

farz kar lo dikhā.ī dete haiñ

jaise ham tum ko saaf dekhte haiñ

vaise tum ko dikhā.ī dete haiñ

tāb-e-nazzāra baaqī hai ki ga.ī

aur dekho dikhā.ī dete haiñ

jo zamāne ko dekhte bhī nahīñ

vo unhīñ ko dikhā.ī dete haiñ

sher paḌhte haiñ aap jab 'vāsif'

dāstāñ-go dikhā.ī dete haiñ

bas wahi wo dikhai dete hain

ek ke do dikhai dete hain

jitne harjai hum ne dekhe hain

utne kis ko dikhai dete hain

wo yahan hain nahin pata hai hamein

phir bhi hum ko dikhai dete hain

dil ko bahlana hi to maqsad hai

farz kar lo dikhai dete hain

jaise hum tum ko saf dekhte hain

waise tum ko dikhai dete hain

tab-e-nazzara baqi hai ki gai

aur dekho dikhai dete hain

jo zamane ko dekhte bhi nahin

wo unhin ko dikhai dete hain

sher paDhte hain aap jab 'wasif'

dastan-go dikhai dete hain