bas yahi baat yahan harf-e-malamat ki hai

bas yahī baat yahāñ harf-e-malāmat kī hai

maiñ ne dariyā kī nahīñ dasht kī bai.at kī hai

qatl sūraj ko kiyā vo bhī chhupā kar ḳhanjar

shaam vāloñ ne sahar meñ ye siyāsat kī hai

varna kyā ham ko ġharaz haal tumhārā pūchheñ

baat ye kuchh bhī nahīñ sirf mohabbat kī hai

ham to maujoñ se laḌe aur kināre pahuñche

ham ne kab Dūbtī kashtī kī himāyat kī hai

abhī dālān meñ utre nahīñ shab ke saa.e

jaane vaale ne sunā ye hai ki ujlat kī hai

ab añdhere hī añdhere haiñ galī-kūchoñ meñ

chāñd-tāroñ ne mire shahr se hijrat kī hai

ye alag baat ki alfāz haiñ ab bhī raushan

tere ḳhanjar ne to is baar bhī jur.at kī hai

ab use DhūñDne niklī haiñ barahna yādeñ

jis ne kāġhaz ke libāsoñ kī tijārat kī hai

mere hoñToñ pe ḳhamoshī ke paḌe haiñ taale

merī āñkhoñ ne mirī aaj bhī shohrat kī hai

bas yahi baat yahan harf-e-malamat ki hai

main ne dariya ki nahin dasht ki baiat ki hai

qatl suraj ko kiya wo bhi chhupa kar KHanjar

sham walon ne sahar mein ye siyasat ki hai

warna kya hum ko gharaz haal tumhaara puchhen

baat ye kuchh bhi nahin sirf mohabbat ki hai

hum to maujon se laDe aur kinare pahunche

hum ne kab Dubti kashti ki himayat ki hai

abhi dalan mein utre nahin shab ke sae

jaane wale ne suna ye hai ki ujlat ki hai

ab andhere hi andhere hain gali-kuchon mein

chand-taron ne mere shahr se hijrat ki hai

ye alag baat ki alfaz hain ab bhi raushan

tere KHanjar ne to is bar bhi jurat ki hai

ab use DhunDne nikli hain barahna yaaden

jis ne kaghaz ke libason ki tijarat ki hai

mere honTon pe KHamoshi ke paDe hain tale

meri aankhon ne meri aaj bhi shohrat ki hai