bas yunhi ek wahm sa hai waqia aisa nahin

bas yūñhī ik vahm sā hai vāqi.a aisā nahīñ

aa.ine kī baat sachchī hai ki maiñ tanhā nahīñ

baiThiye peḌoñ kī utran kā alaav tāpiye

barg-e-sozāñ ke sivā darvesh kuchh rakhtā nahīñ

uf chaTaḳhne kī sadā se kis qadar Dartā huuñ maiñ

kitnī bāteñ haiñ ki dānista jinheñ sochā nahīñ

apnī apnī sab kī āñkheñ apnī apnī ḳhvāhisheñ

kis nazar meñ jaane kyā jachtā hai kyā jachtā nahīñ

chain kā dushman huā ik mas.ala merī taraf

us ne kal dekhā thā kyuuñ aur aaj kyuuñ dekhā nahīñ

ab jahāñ le jaa.e mujh ko jaltī-bujhtī aarzū

maiñ bhī is jugnū kā pīchhā chhoḌne vaalā nahīñ

kaisī kaisī pursisheñ 'anvar' rulātī haiñ mujhe

ketiyoñ se kyā kahūñ maiñ abr kyuuñ barsā nahīñ

bas yunhi ek wahm sa hai waqia aisa nahin

aaine ki baat sachchi hai ki main tanha nahin

baiThiye peDon ki utran ka alaw tapiye

barg-e-sozan ke siwa darwesh kuchh rakhta nahin

uf chaTaKHne ki sada se kis qadar Darta hun main

kitni baaten hain ki danista jinhen socha nahin

apni apni sab ki aankhen apni apni KHwahishen

kis nazar mein jaane kya jachta hai kya jachta nahin

chain ka dushman hua ek masala meri taraf

us ne kal dekha tha kyun aur aaj kyun dekha nahin

ab jahan le jae mujh ko jalti-bujhti aarzu

main bhi is jugnu ka pichha chhoDne wala nahin

kaisi kaisi pursishen 'anwar' rulati hain mujhe

ketiyon se kya kahun main abr kyun barsa nahin