basa-auqat aa jate hain daman se gareban mein

basā-auqāt aa jaate haiñ dāman se garebāñ meñ

bahut dekhe haiñ aise josh ashk-e-chashm-e-giryāñ meñ

nahīñ hai taab zabt-e-ġham kisī āshiq ke imkāñ meñ

dil-e-ḳhūñ-gashta yā dāman meñ hogā yā garebāñ meñ

mubārak bādiya-gardo bahār aa.ī bayābāñ meñ

numūd-e-rañg-e-gul hai har sar-e-ḳhār-e-muġhīlāñ meñ

ziyāda ḳhauf-e-rusvā.ī nahīñ hai soz-e-pinhāñ meñ

dhuāñ hotā hai lekin kam charāġh-e-zer-e-dāmāñ meñ

hamesha pī ke mai jaam o surāhī toḌ detā huuñ

na merā dil tarastā hai na farq aatā hai īmāñ meñ

maza kyuuñ kāvish-e-zaḳhm-e-jigar kā aaj kam kam hai

namak kī koī chuTkī rah ga.ī hogī namak-dāñ meñ

janāb-e-qais ne dil se bhulāyā donoñ aalam ko

junūñ ke chaar harfoñ kā sabaq lekar dabistāñ meñ

bahār aa.ī milā ye hukm mujh ko aur bulbul ko

ki vo kaaTe qafas meñ ḳhaak chhānūñ maiñ bayābāñ meñ

tarannum-reziyāñ bazm-e-suḳhan meñ sun ke 'sā.el' kī

gumāñ hotā hai bulbul ke chahakne kā gulistāñ meñ

basa-auqat aa jate hain daman se gareban mein

bahut dekhe hain aise josh ashk-e-chashm-e-giryan mein

nahin hai tab zabt-e-gham kisi aashiq ke imkan mein

dil-e-KHun-gashta ya daman mein hoga ya gareban mein

mubarak baadiya-gardo bahaar aai bayaban mein

numud-e-rang-e-gul hai har sar-e-KHar-e-mughilan mein

ziyaada KHauf-e-ruswai nahin hai soz-e-pinhan mein

dhuan hota hai lekin kam charagh-e-zer-e-daman mein

hamesha pi ke mai jam o surahi toD deta hun

na mera dil tarasta hai na farq aata hai iman mein

maza kyun kawish-e-zaKHm-e-jigar ka aaj kam kam hai

namak ki koi chuTki rah gai hogi namak-dan mein

janab-e-qais ne dil se bhulaya donon aalam ko

junun ke chaar harfon ka sabaq lekar dabistan mein

bahaar aai mila ye hukm mujh ko aur bulbul ko

ki wo kaTe qafas mein KHak chhanun main bayaban mein

tarannum-reziyan bazm-e-suKHan mein sun ke 'sael' ki

guman hota hai bulbul ke chahakne ka gulistan mein