basanti rut hai sab phulon ko tu mahfuz rakhna

basantī rut hai sab phūloñ ko tū mahfūz rakhnā

mere allah khilī sarsoñ ko tū mahfūz rakhnā

saroñ ko kāTne kī fasl phir se aa ga.ī hai

in afshāñ se bharī māñgoñ ko tū mahfūz rakhnā

jaleñ jab ghar to yā-rab tujh se itnī iltijā hai

dupaTToñ se Dhake chehroñ ko tū mahfūz rakhnā

fazāoñ meñ hazāroñ baaz mañDlāne lage haiñ

har āñgan kī sabhī chiḌiyoñ ko tū mahfūz rakhnā

abhī ḳheme bhī haiñ kuuze bhī haiñ paanī nahīñ hai

qasam abbās kī bachchoñ ko tū mahfūz rakhnā

buzurgoñ kī duā.eñ aaj kitnī lāzmī haiñ

javānoñ ke liye būḌhoñ ko tū mahfūz rakhnā

savā neze pe sūraj aa rahā hai aa na jaa.e

havāoñ ke ḳhunuk jhoñkoñ ko tū mahfūz rakhnā

sulagtī rut meñ 'shabnam' ye tirā hī farz Thahrā

chaman meñ ab ke sab kaliyoñ ko tū mahfūz rakhnā

basanti rut hai sab phulon ko tu mahfuz rakhna

mere allah khili sarson ko tu mahfuz rakhna

saron ko kaTne ki fasl phir se aa gai hai

in afshan se bhari mangon ko tu mahfuz rakhna

jalen jab ghar to ya-rab tujh se itni iltija hai

dupaTTon se Dhake chehron ko tu mahfuz rakhna

fazaon mein hazaron baz manDlane lage hain

har aangan ki sabhi chiDiyon ko tu mahfuz rakhna

abhi KHeme bhi hain kuze bhi hain pani nahin hai

qasam abbas ki bachchon ko tu mahfuz rakhna

buzurgon ki duaen aaj kitni lazmi hain

jawanon ke liye buDhon ko tu mahfuz rakhna

sawa neze pe suraj aa raha hai aa na jae

hawaon ke KHunuk jhonkon ko tu mahfuz rakhna

sulagti rut mein 'shabnam' ye tera hi farz Thahra

chaman mein ab ke sab kaliyon ko tu mahfuz rakhna