bashar ki KHu mein salamat rawi nahin shayad

bashar kī ḳhū meñ salāmat ravī nahīñ shāyad

miTe ye nasl to āsūda ho zamīñ shāyad

huuñ apne zehn kī tārīkiyoñ meñ sargardāñ

sunā hai ye ki ḳhudā hai yahīñ kahīñ shāyad

mire ḳhayāl ke ḳhalvat-kade haiñ dair-o-haram

mire mizāj ke mausam haiñ kufr-o-dīñ shāyad

maiñ us ko dekhūñgā lekin ik aur aalam meñ

maiñ us ko pā.ūñgā lekin abhī nahīñ shāyad

maiñ chhoḌ aaya masā.il ke jis jahannum ko

mire nasīb kī jannat bhī thī vahīñ shāyad

uThī vo aañkh to dil kā surāġh bhī na milā

hiran se haar gayā ye subuktagīñ shāyad

adū bhī dost bhī sab ham pe mehrbāñ the bahut

kuchh apne aap se bargashta the hamīñ shāyad

har ek haath meñ ḳhanjar dikhā.ī detā hai

ulaT rahī hai zamāne kī āstīñ shāyad

bashar ki KHu mein salamat rawi nahin shayad

miTe ye nasl to aasuda ho zamin shayad

hun apne zehn ki tarikiyon mein sargardan

suna hai ye ki KHuda hai yahin kahin shayad

mere KHayal ke KHalwat-kade hain dair-o-haram

mere mizaj ke mausam hain kufr-o-din shayad

main us ko dekhunga lekin ek aur aalam mein

main us ko paunga lekin abhi nahin shayad

main chhoD aaya masail ke jis jahannum ko

mere nasib ki jannat bhi thi wahin shayad

uThi wo aankh to dil ka suragh bhi na mila

hiran se haar gaya ye subuktagin shayad

adu bhi dost bhi sab hum pe mehrban the bahut

kuchh apne aap se bargashta the hamin shayad

har ek hath mein KHanjar dikhai deta hai

ulaT rahi hai zamane ki aastin shayad