bashar ki zad mein junun bhi hai aagahi bhi hai

bashar kī zad meñ junūñ bhī hai āgahī bhī hai

ye musht-e-ḳhāk farishta bhī aadmī bhī hai

hazār haif vahī dushmanī pe haiñ maa.il

vo log jin pe hameñ haqq-e-dostī bhī hai

dayār-e-ishq meñ aise gadā bhī dekhe haiñ

ki jin ke zer-e-kaf-e-pā shahanshahī bhī hai

fasāna jis ko samajh kar bigaḌ rahe ho tum

jo sun sako to vo ahvāl vāqa.ī bhī hai

havas sharīk ho is meñ to maut hai varna

jo sidq ho to mohabbat meñ zindagī bhī hai

har ek tār-e-rag-e-jāñ meñ naġhmagī bhar dī

sitam ki us pe ye talqīn-e-ḳhāmushī bhī hai

vafā kā zikr to karte haiñ raat din sab log

vafā zamāne meñ lekin kahīñ rahī bhī hai

payām-e-vasl diyā hai hameñ adū ke haath

karam ke saath adā-e-sitamgarī bhī hai

ye dil jo vāqif-e-asrār-e-do-jahāñ niklā

ḳhushā-nasīb ki ye ḳhud se ajnabī bhī hai

surūr ishq kā hai zarf-e-dil pe dār-o-madār

ye dā.imī sā nasha bhī hai aarzī bhī hai

tū pī ke lutf uThātā hai yā bahaktā hai

uThā ki shīshe meñ ik dev bhī parī bhī hai

hujūm-e-ġham ke añdhere bhī dil meñ haiñ lekin

kisī kī yaad kī ujlī sī raushnī bhī hai

rahīn-e-vus.at-e-dāmāñ hai ishq kī ḳhairāt

saḳhī ke ghar meñ kisī baat kī kamī bhī hai

bashar ki zad mein junun bhi hai aagahi bhi hai

ye musht-e-KHak farishta bhi aadmi bhi hai

hazar haif wahi dushmani pe hain mail

wo log jin pe hamein haqq-e-dosti bhi hai

dayar-e-ishq mein aise gada bhi dekhe hain

ki jin ke zer-e-kaf-e-pa shahanshahi bhi hai

fasana jis ko samajh kar bigaD rahe ho tum

jo sun sako to wo ahwal waqai bhi hai

hawas sharik ho is mein to maut hai warna

jo sidq ho to mohabbat mein zindagi bhi hai

har ek tar-e-rag-e-jaan mein naghmagi bhar di

sitam ki us pe ye talqin-e-KHamushi bhi hai

wafa ka zikr to karte hain raat din sab log

wafa zamane mein lekin kahin rahi bhi hai

payam-e-wasl diya hai hamein adu ke hath

karam ke sath ada-e-sitamgari bhi hai

ye dil jo waqif-e-asrar-e-do-jahan nikla

KHusha-nasib ki ye KHud se ajnabi bhi hai

surur ishq ka hai zarf-e-dil pe dar-o-madar

ye daimi sa nasha bhi hai aarzi bhi hai

tu pi ke lutf uThata hai ya bahakta hai

uTha ki shishe mein ek dew bhi pari bhi hai

hujum-e-gham ke andhere bhi dil mein hain lekin

kisi ki yaad ki ujli si raushni bhi hai

rahin-e-wusat-e-daman hai ishq ki KHairaat

saKHi ke ghar mein kisi baat ki kami bhi hai