bashar ko chahiye himmat se kaam le ke chale

bashar ko chāhiye himmat se kaam le ke chale

rah-e-junūñ pe bagūloñ kā naam le ke chale

ye kaisā tarz-e-vafā hai pahuñch ke manzil par

ham us ko bhuul ga.e jis kā naam le ke chale

koī hai dār-o-rasan par kisī kī kaj hai kulāh

har ek shaḳhs bas apnā maqām le ke chale

palak palak pe charāġhāñ hai un kī yādoñ kā

nafas nafas kisī hamdam kā naam le ke chale

na ab 'qatīl' rahe haiñ na shā.erī kī dhanak

rah-e-suḳhan meñ koī kis kā naam le ke chale

maiñ haal tīra-shabī kā sunā.ūñ kis ko 'kiran'

charāġh DhūñDne nikle the shaam le ke chale

bashar ko chahiye himmat se kaam le ke chale

rah-e-junun pe bagulon ka nam le ke chale

ye kaisa tarz-e-wafa hai pahunch ke manzil par

hum us ko bhul gae jis ka nam le ke chale

koi hai dar-o-rasan par kisi ki kaj hai kulah

har ek shaKHs bas apna maqam le ke chale

palak palak pe charaghan hai un ki yaadon ka

nafas nafas kisi hamdam ka nam le ke chale

na ab 'qatil' rahe hain na shaeri ki dhanak

rah-e-suKHan mein koi kis ka nam le ke chale

main haal tira-shabi ka sunaun kis ko 'kiran'

charagh DhunDne nikle the sham le ke chale