basti basti ghor andhera suna suna jada tha

bastī bastī ghor añdherā suunā suunā jaada thā

shab ke pichhle-pahar kā sannāTā kuchh aur ziyāda thā

sehn-e-chaman meñ ravish ravish par aas ke phuul ugaa.e the

lekin ye mahsūs huā har manzar pesh-uftāda thā

lafz koī aaseb na the log us kī sadā se kyuuñ Darte

vaqt ke andhe kuñ.eñ kā ye āshob to sīdhā-sāda thā

jiite jāgte phuul badan meñ kaise kaise rog lage

dil kā kyā hai dil to apne ḳhvāboñ kā shahzāda thā

maslihateñ aaḌe aa.eñ yā ahl-e-junūñ dil chhoḌ ga.e

jo honā hai aaj ho jaa.e dil is par āmāda thā

basti basti ghor andhera suna suna jada tha

shab ke pichhle-pahar ka sannaTa kuchh aur ziyaada tha

sehn-e-chaman mein rawish rawish par aas ke phul ugae the

lekin ye mahsus hua har manzar pesh-uftada tha

lafz koi aaseb na the log us ki sada se kyun Darte

waqt ke andhe kunen ka ye aashob to sidha-sada tha

jite jagte phul badan mein kaise kaise rog lage

dil ka kya hai dil to apne KHwabon ka shahzada tha

maslihaten aaDe aaen ya ahl-e-junun dil chhoD gae

jo hona hai aaj ho jae dil is par aamada tha