basti mein ek gosha-e-viran hi to tha

bastī meñ ek gosha-e-vīrān hī to thā

phaT bhī gayā to kyā hai garebān hī to thā

tum bhī zarā sī baat ko ghar le ke aa ga.e

fōtpath par jo mar gayā insān hī to thā

achchhā huā ki chāñd samundar meñ jā girā

ai raat ham pe ye tirā ehsān hī to thā

bachchoñ ne toḌ bhī diyā us ko to kyā huā

miTTī kā ek chhoTā sā guldān hī to thā

mātam guzishta raat kī chorī kā kyā kareñ

kamre meñ ek 'mīr' kā dīvān hī to thā

āñkhoñ se ye sarāb bhī bach kar nikal gayā

TuuTā jo raat kāñch kā paimān hī to thā

maanā ki dil ke paas se guzrā magar 'shakīl'

āḳhir vo ek lamha-e-anjān hī to thā

basti mein ek gosha-e-viran hi to tha

phaT bhi gaya to kya hai gareban hi to tha

tum bhi zara si baat ko ghar le ke aa gae

footpath par jo mar gaya insan hi to tha

achchha hua ki chand samundar mein ja gira

ai raat hum pe ye tera ehsan hi to tha

bachchon ne toD bhi diya us ko to kya hua

miTTi ka ek chhoTa sa guldan hi to tha

matam guzishta raat ki chori ka kya karen

kamre mein ek 'mir' ka diwan hi to tha

aankhon se ye sarab bhi bach kar nikal gaya

TuTa jo raat kanch ka paiman hi to tha

mana ki dil ke pas se guzra magar 'shakil'

aaKHir wo ek lamha-e-anjaan hi to tha