bastiyan luTti hain KHwabon ke nagar jalte hain

bastiyāñ luTtī haiñ ḳhvāboñ ke nagar jalte haiñ

ham vahāñ haiñ ki jahāñ shām-o-sahar jalte haiñ

dil ke aivān meñ afsurda charāġhoñ kā dhuāñ

duur kuchh duur vo yādoñ ke khañDar jalte haiñ

phir kisī manzil-e-jāñ-soz kī jānib haiñ ravāñ

chob-e-sahrā kī tarah ahl-e-safar jalte haiñ

yuuñ to pur-amn hai ab shahr-e-sitamgar lekin

kuchh makāñ ḳhud hī sar-e-rāhguzar jalte haiñ

hai ba-zāhir koī sho.ala na chamak aur sharar

ham kisī ġham meñ ba-andāz-e-digar jalte haiñ

ātish-e-talḳhī-e-hālāt meñ kyā kuchh na jalā

ab gila kyā hai jo ehsās ke par jalte haiñ

go ho barfāb bhī taskīn hai dushvār 'sahar'

apnī hī aag meñ arbāb-e-hunar jalte haiñ

bastiyan luTti hain KHwabon ke nagar jalte hain

hum wahan hain ki jahan sham-o-sahar jalte hain

dil ke aiwan mein afsurda charaghon ka dhuan

dur kuchh dur wo yaadon ke khanDar jalte hain

phir kisi manzil-e-jaan-soz ki jaanib hain rawan

chob-e-sahra ki tarah ahl-e-safar jalte hain

yun to pur-amn hai ab shahr-e-sitamgar lekin

kuchh makan KHud hi sar-e-rahguzar jalte hain

hai ba-zahir koi shoala na chamak aur sharar

hum kisi gham mein ba-andaz-e-digar jalte hain

aatish-e-talKHi-e-haalat mein kya kuchh na jala

ab gila kya hai jo ehsas ke par jalte hain

go ho barfab bhi taskin hai dushwar 'sahar'

apni hi aag mein arbab-e-hunar jalte hain