bastiyan viran hongi kasrat-e-tamir se

bastiyāñ vīrān hoñgī kasrat-e-ta.amīr se

ye khañDar ubhre haiñ duniyā meñ isī tadbīr se

koh bhī karte haiñ zāhir shiddat-e-jazbāt ko

zalzale aate haiñ aksar garmī-e-tahrīr se

merī qismat ke sitāre āstīñ meñ haiñ mirī

ab qadam nikleñge bāhar halqa-e-taqdīr se

ab ke sochā thā kareñ kuchh ham bhī zaḳhmoñ kā ilaaj

kar ga.e mausam davāoñ ko judā tāsīr se

ek ik lamhe se miltā hai yahī ham ko shu.ūr

ik sadī ho jā.eñge pīchhe zarā tāḳhīr se

zindagī Thahrā havāoñ meñ ye lahroñ kā nizām

saarī duniyā raqs meñ hai ek hī zanjīr se

yuuñ huā mahsūs dil ko jab milā sāñsoñ kā lams

har badan vāqif nahīñ hai dhuup kī tāsīr se

haiñ yahī nī۔ndeñ to koī chhīn le nī۔ndeñ 'nazar'

ḳhvāb se pahle hoñ vāqif ḳhvāb kī ta.abīr se

bastiyan viran hongi kasrat-e-tamir se

ye khanDar ubhre hain duniya mein isi tadbir se

koh bhi karte hain zahir shiddat-e-jazbaat ko

zalzale aate hain aksar garmi-e-tahrir se

meri qismat ke sitare aastin mein hain meri

ab qadam niklenge bahar halqa-e-taqdir se

ab ke socha tha karen kuchh hum bhi zaKHmon ka ilaj

kar gae mausam dawaon ko juda tasir se

ek ek lamhe se milta hai yahi hum ko shuur

ek sadi ho jaenge pichhe zara taKHir se

zindagi Thahra hawaon mein ye lahron ka nizam

sari duniya raqs mein hai ek hi zanjir se

yun hua mahsus dil ko jab mila sanson ka lams

har badan waqif nahin hai dhup ki tasir se

hain yahi ni۔nden to koi chhin le ni۔nden 'nazar'

KHwab se pahle hon waqif KHwab ki tabir se